UMSNING, Naitung 15: Ka Khasi Students’ Union (KSU) North Khasi Hills District Unit ha ka step sngi Balang ka la ioh bat ia kawei ka kali shimet (Private) ha Umsning na ka jingsuba ba ka dei kaba shalan drok ha nongbah Shillong.
La ong ba ka KSU NKHD ka la ioh jingtip haba iadei katei ka kali bad ka la pynlong ia ka jingpynap shrip ha Umsning ban ioh bat ia katei ka kali, bad la kynnoh ba katei ka kali ka dei kaba don ia u number plat thok, ha kane ka jingpynap shrip la ialam da u Samla Jester Nongbet, u Organising Secretary ka KSU NKHD bad ki dkhot.
Kat kum ka khubor ba la iohlum, ka KSU ka la ioh ïa ka jingtip ba tikna haba iadei bad ka jingdon ka kali private kaba mut shalan ïa u droks (drugs). Kine ki nongshalan droks ki la leh thok da kaba buh ïa ki number plate nongwei ne ki number plate ba bakla halor ka kali jong ki.
Na katei ka kali ka KSU ka la lap ba don ka jingïasylla hapdeng ki briew ba nabar Jylla ryngkat ki katto katne ki samla Khasi kiba long ki nongkit bad nongsupply ïa kine ki jingdih pynbuaid hapoh ka Jylla.
Ka Seng ka la kynnoh ba kine ki briew ki pynlong ïa ka thain Umsning bad Ri-Bhoi hi baroh kawei kum ka lynti ban pynpoi ïa u droks sha kiwei pat ki jaka.
Ka KSU hadien ba ka la dep ki jingtohkit ia kitei ki briew, ka la aiti noh ïa ki sha ki Pulit ka Umsning Police Station bad ka Seng ka la kyntu jur ïa ki bor ka aiñ ban nym map ïa kiba kum kine ki briew kiba pynsniew ia ka imlang ka sahlang.
