Shillong Naitung 09: U President ka HSPDP u Bah K.P Pangniang u la pyntip ba ka party kan shym la pynkhreh eiei ban iakhun ia ka ilekshon ha ka ilekshon MP shiteng samoi ban sa wan. Hynrei u la ong ba ka seng mynta kan ym kyrshan ia u kyrtong ka UDP.
Ka daw ba ka HSPDP kan ym kyrshan ia ka UDP kadei namar ba kam shym la don ka jingiamonlang ha ka RDA ba ka seng ka kwah ban pynieng la u jong u symbol bad ka kwah ruh ban buh la u jong u symbol jong ka RDA hynrei ym shym lah shuh ban iapynbeit namar ka jinglyngkot ka por.
U la ong ba ka party kan iai iatreilang bad ka UDP ha ka RDA ban peit ia ki mat ki jura jong ka jylla baroh kawei hynrei namar ba ym ioh lad ban ia pynbeit bha ia u kyrtong na ka liang ka HSPDP kan ym kyrshan lang ia u kyrtong ka UDP.
U la ong ba ka seng mynta kan long pdeng bad kan ieh ha ka jingstad ki nongialam jong ki constituency bapher bapher ba iano kin kyrshan ha kane ka ilekshon.
Shillong Naitung 09: U President ka HSPDP u Bah KP Pangniang u la pynpaw ka jingkyrmen ba ha ka bynta kaba ar ka jingpynbeit pud bad ka jylla Assam yn sa lah ban poi sha ka jingpynbeit ia ki 6 tylli ki jaka iakajia pud hapdeng ka Meghalaya bad Assam.
U la ong ba haduh mynta ki 12 tylli ki jaka iakajia kim don ha ka map jong ka jylla Meghalaya. Kaba mut ba naduh ba ialeh ia ka sub state ba la pynbna ha u snem 1969 haduh ba ioh ia ka jylla ba pura ha u snem 1972 ia kine ki jaka la shah ieh shabar na ka map ba thymmai ka jylla Meghalaya, katb aka jingialeh ban ioh ia ka jylla baroh ki jaidbynriew khasi pnar bad Garo ki khmih lynti ban don lut ha ka jylla ba thymmai, hynrei ka Northeastern reorganisation act 1971 la kynthup ia ka jylla Meghalaya tang ia ka garo hills district bad ka united khasi jaintia hills district bad khlem don shuh ki hima ba mynshwa bad ki hima ba mynhyndai na kata ka daw ka jingioh ia ka jylla kam ioh katkum ba la thmu da ki nongialam barim ka jylla bad ym shym don ka jingpynbeit thymmai ia ki pud bad kito ki district ki hap hi ha ki district ba mynhyndai naduh ka por phareng bad ka sorkar Assam.
U la ong ba ki nongshong shnong tynrai ka thain Langpih ki la long ba la kloi ban iakren bad ban pyni ia ka sur ban iathuh ia ka histori bad ia ka daw ba naduh hyndai hynthai ba ki shong ha katei ki jaka bad la dep phah ruh ia ki kot ki sla ba ki mon ban don hapoh ka jylla. U la ong ba ki khasi kiba shong ha kitei ki thain khappud kim ju leit ban ai FIR wat tang kawei ruh sha Assam bad kim ju shim ruh ia ki kam pynroi pynpar lane ban thep vote.
U la ong ba ka jingdon ki nepali ha katei ka thain na ka liangh ka seng kam pyrshah hynrei ka khyndew ka shyiap, bad ka synshar khadar kan long hapoh ki trai ri trai muluk bad ki nongshong shnong tynrai.
