Shillong Jylliew 22: Ka United Democratic Party ha ka sngi nyngkong ka taiew ka la kyntait ia ki khubor kiba kam ba ka party ka la nang tlot ha ka jingialam u President ba rangbah ka seng u Bah Metbah Lyngdoh.
Haba kren sha ki lad pathai khubor u Bah Titos Chyne u la ong ba ka seng ka dang iai long kawei bad ka dang khlain watla ki don katto katne ki nongialam ka party kiba la mih noh na ka seng.
Haba kren halor ka jingkren u MLA ka UDP uba dei ruh u myntri barim ka jylla u Bah Paul Lyngdoh halor ka jingkren jong u uba la kren halor ka jingmih noh ki katto katne ki nongialam, u Bah General Secretary ka seng u Bah Titostarwell Chyne u la ong ba kum kine ki jingjia ki ju jia ha kano kano ka seng sain pyrthei bad wat ha ki national party ruh.
U Bah Titos u la ong ba ka jingmih noh ki katto katne ki nongialam na ka seng kam mut ba ka party ka la kut noh, bad bvynrap ruh ba ka UDP ka dang iai khlain ha ka rukom ialam bad ka dang iai long ka party kaba heh ha ka jylla.
U la kyntait ruh ia ka jingong ba ka jingmih noh ki nognialam ka dei na ka jingtlot ha ka jinglong nongialam u President u Bah Metbah Lyngdoh, da kaba ong ba ka UDP ka la nang kiew ha ka jingialam u Bah Metbah da ka kiew na ka 6 ngut sha ka 11 ngut ka jingdon ki MLA ha ka ilekshon 2023.
Halor ki khubor ba lah ban don ka jingïapher jingmut hapoh ka UDP, uBah Titos u la kyntait ia kane bad u la pynskhem ba baroh ki MLA jong ka seng ki dang ïatylli bad ïaineh ha ka UDP.
