U PRESIDENT KA SENG U DEI BAN PEIT SHABAR KA CONSTITUENCY LAJONG, KI NONGIALAM KA UDP KI HAP LEIT KYRPAD IA U CONRAD BAD BAH PRESTONE BAN IOH TREIKAM HA KA SORKAR

Shillong Risaw 1: U MLA ka West Shillong constituency u ba dei ruh u nongialam jong ka UDP u bah Paul Lyngdoh hynne ka sngi haba ia kren bad ki nongthoh khubor halor ka sain pyrthei bad ka sien jam kaba un sa shim u la ong ba mynta u dang ap ia kren bad ki nongkyrshan shano kin iaid.
Haba ia dei bad ka jingleit pyniasoh jong ki 8 ngut ki MLA ka UDP sha ka BJP na ka liang u bah Paul u la ong ba ma u , um pat shim ia ka rai bad ki dang peit pyrman bha, u la ong ruh ba ngi la iohi ia shibun ki jingeh kiba mih kum ka mat kaba ia dei bad ka elction commission, ka SIR bad ki wei kiwei kane kan dei ka lynti kaba na ka liang ka jong ki shano kin sa shim ia ka rai.
Haba ia dei bad ka jingtyrwa jong ki nongialam jong ka KHNAM ba ka jingkhang ka dang plie ba kin wan phai biang sha ka seng na ka liang u bah Paul u la ai khublei ia ka jingtyrwa ka jong ki, hynrei u la ong ba kan shem jingeh namar ka KHNAM ka dei ka seng kaba la pra ar sien bad kam don shuh kata ka jingtip paidbah ba kane ka seng ka dang don bad na ka liang ka jong u , ruh ym tip mano kita ki nongialam jong ka KHNAM lait noh tang u bah Thomas Passah, ka long kaba eh ban pynkhi im biang ia ka seng sain pyrthei kaba la jah.
Shuh shuh na ka liang u bah Paul u la ong ba ka sain pyrthei ha ka jylla ka pher namar ha shuwa ka ilekshon ki kyrtong ki la ia khun tyngeh u wei ia u wei pat hynrei hadien kata kin wan ban ia trei lang hadien ha ilekshon, u la ong ba ha ka politik kam don kata ka ban ongba ki dei ki paralok kiba iai neh sah, ka long ka man kumba ka long mynta ka dang kloi namar ka ilekshom MP shiteng samoi kan sa long shen, ka ilekshon sha GHADC ruh kan sa long kine ki artylli ki dei ki bynta kiba ngin hap ban peit ha ka sain pyrthei ha ka jylla.
Haba ia dei bad ka jingdawa ban pynkylla nongialam ha ka UDP ka dei kaba la sdang da ma u ha kaba ka la don ka jingiakhun ia ka kam hapdeng jong u bad u bah Metbah ha kaba u bah Metbah u la jop tang khyndiat, u la ong ruh ba u ju kren ba ki don kam ia u nongialam u ba iohi palat ia ka constituency jong u, ngim lah ban don ia u President jong ka seng u ba pyrshang ban wan rah district ha ka constituency ka jong u bad jong ka constituency kaba ha jan kaba la mih khmat da u bah Brol, ngim lah ban don kum kita ki nongialam ki bym don ia ka jingiohi jngai.
U la ong ruh ba ka shithi kaba u la soi ka dei tang ha ka shithi kaba la pynrung ia u kum u myntri ka sorkar jylla, katba ki wei ki nongialam kiba la shah thung ha ka sorkar ym don u wei na ki ba kin ioh ia ka jingai jingmut na u President ka seng, ki don kiba hap ban leit tied jingkhang jong u Conrad Sangma , bah Prestone Tynsong lada ka long kumne kan myntoi aiu ban don ia u PP leader, kine ki dei ki daw kiba wanrah ia ka jingbym sngew tynnad.
U la bynrap da kaba ong ba kine ki dei ki daw kiba buh jingeh ia ka seng ha kaba mynta ka hap ban siew ia ka, na ka 12 ngut ki MLA sha kaba mynta sa tang u wei u MLA.