Shillong Jylliew 08: U President ka Meghalaya Cricket Association u James PK Sangma ha ka sngi nyngkong ka taiew u la ong ba ka ain ka kren shai ba kino kino kiba dei ki nongmihkhmat kum ki MP ne ki MLA ki lah ban bat ia ki kam ba hakhmat ha ka sports hynrei lait noh tang ki Myntri sorkar ne ki shakri sorkar.
Haba ia kren halor ka jingbym pat siew ia ka tulop ki nongtrei ka MCA u James u la ong ba ka mat ba slem ban pyllait ia ka tulop na ka bynta ki nongtrei ka MCA kadei ka kam hapoh ka Association hi. U la pyntip ba ka Association ka la mad jingeh ba slem bha kaba la ktah ia ka jingtreikam bad ka wanrah ka jingslem ban treikam.
U la ong ba ki jingpyrshang ban pynbha ki dang iaid shakhmat ban pynbeit kloi ia kane ka mat khnang ba yn ioh pyllait noh ia ka tulop na bynta ki nongtrei.
Ha kaba iadei bad ka jingkynnoh ba ka don ka jingshah leh kynshlein ia ki thei ialehkai, u James u la ong ba dei ban don ka Internal Complain Commmitte ban peit bniah ia kane. U la kdew ba u la shimti ia ka kam kum u President ka MCA dang ha u bnai Kyllalyngkot bad ba katei ka mat ka long shwa ka por jong u, watla u tip ia ki jingeh bad ki jingduna hapoh ka kynhun
U James u la ong ba ka MCA mynta ka dang ap ia ka kaiphod jong ka Meghalaya State Women’s Commission. U la pynthikna ba ynda la ïoh ïa ka kaiphod, ka MCA kan sa shimkhia mardor ïa kane ka kam bad kan sa sdang ïa ki kam kiba dei katkum ka jinglap jong ka.
