Shillong Risaw 17: U Myntri Rangbah ka Jylla, u Conrad K. Sangma, ha ka Sngi Thohdieng u la ïashim bynta ha ka jingïalang pynkut jong ka bynta ba ar jong ka Chief Minister’s Youth Engagement Program (CMYEP) 2026 ha Lariti Auditorium, Shillong.
Haba kren ha katei ka jingialang kum u kongsan U Conrad u la ong ba ka jylla ka dei kaba don bun ki samla bad ka sorkar ka pynleit jingmut ban bei tyngka ban kyntiew ia ki sap jong ki bad ban thaw ia ki lad kamai ha ki bynta bapher bapher, kynthup ia ka jingialehkai, ka kam rwai bad ka kam khaii, da kaba kyntu ïa ki samla ban ngeit ha lade bad ban ïatreilang ban kyntiew ïa ka Jylla.
U la iathuh ba kane ka program kaba la sdang ha u snem 2013, la pyniar ha u snem 2025 ban ailad ia ki samla na baroh 56 tylli ki block ban iashim bynta bad ioh ia ki lad thymmai.
Kumba 14,000 ngut ki samla na baroh 56 tylli ki block ki la ïashim bynta ha kane ka prokram. Na kine, 2,400ngut ki la iashim bynta ha ka kyrdan distrik lane ka district level, 1,125 ngut ki la kyntiew sha ka kyrdan jylla lane ka state level, 480 ngut ki la ïoh ïa ka lad ban leit sha kiwei ki bynta jong ka ri, bad 48 ngut ki la ïoh ïa ka lad ha ka pyrthei shabar ri.
U myntri rangbah ka jylla u la kyntu ruh ïa ki samla ban shim bynta ha ki kam shakri paidbah bad ban ïatreilang kynthup ia ki nongrep, ki kynhun Self-Help Groups bad ki shnong ki thaw.
Shuh shuh ha kane ka sngi, u la sam ruh ia ki khusnam sha ki nongjop ha ki jiangiakop bapher bapher.
