Kubur ka Shnong Jakrem ba kyrduh um ha kine ki snem ba la dep, kyrmen lyngba ka skhim ba thymmai ka umbam umdih kan sa biang ha Shnong

Shillong Risaw 14: Ka Village Water and Sanitation Committee (VWSC) jong ka shnong Jakrem ha ka 14 tarik u Risaw 2026 ka lamih sha khmat ban pynshai paidbah haba ia dei bad ka jingmih khubor ha kine ki khyndiat sngi ba ka shnong Jakrem ka kyrduh um bad ki nongshong shnong ki mad jingeh.
Na ka liang ki nongialam ka VWSC ki la kubur haba ia dei bad ka jing kyrduh um ha ka shnong ha kine ki arsnem kiba la leit, bad ki paidbah ki la mad jingeh na ka daw jong ka jingtyrkhong um ha ki katto katne ki dong. Watla katta ka VWSC ryngkat bad ka Shnong baroh kawei kim shym la thiah thai satia, ki iai wad ia ki lad ki lynti ban pynduh ia kane ka jingeh ba ki paidbah ki mad.
Ki Nongialam Shnong ki la leit ban kynduh la bunsien ia ka PHE Mawkyrwat Division ban ia pyrkhat bad saindur janai halor kane ka kam. Ka VWSC ka kyrpad ia ka ophis ban pynbha ne maramot iaki pump kiba la duh. Na ka liang ka ophis ruh ka la iarap ban wad ki lad ki lynti ban pynbha bad maramot ia ki pump kiba la duh, kiba lah ban ai um ia ki saw tylli ki kyntoid dong, kata ka Dong Mission, Laitmawbah, Nonghalait (Pyndensiej) bad Sngimietnah.
Shuh shuh na ka liang ka ophis ka la iathuh ba ka daw jong ka jingduh khah khah ki pump um ka dei na ka jingduna ka voltage jong ka light. Kumba long ha kine ki snem ba la dep ka jingioh um bam um dih ha ka shnong Jakrem kam da long tikna namar ka jingduna ki tlong um, wat hadien bala ioh iaka scheme JJM ruh ki tylong um ki neh hi kumjuh.Ki la iathuh ruh ba ki pump la shu pyndonkam da ki pump ki ba rim kiba la palat 20 snem tam.
Na ka liang ka VWSC Jakrem ryngkat ka bor shnong ki iatreilang ryngkat ryngkat bad ka ophis PHE Mawkyrwat Division ban wan peit ba ka um bam umdih ha ka shnong kan biang bad sdang shen ka sorkar ka la mang pisa ban pynbiang um ia ka shnong da ka wei pat ka skhim ba thymmai kaba u MLA ka Mawkyrwat u la wan ban buh ia u Mawnongrim bad mynta ka tnat ka la khot tender ia kane ka skhim um ba thymmai.
Ka VWSC ryngkat bad ka Excutive Dorbar Shnong ka ai khublei ia ka ophis PHE Mawkyrwat Division kaba la leh shitom ban pynioh ia kane ka scheme ba thymmai kaba yn pump na wah Rilang. Ka VWSC ka kyrmen ba lyngba kane ka skhim bathymmai kan long ka jingkyrkhu bakhraw iaki paidbah nongshong shnong jong ka shnong Jakrem.