Shillong Risaw 3: Ka khasi Students Union mynta ka sngi Saitjain ka la wah ia ki banner ha khyrdop ophis u SP bad ha khyrdop ka Secretariat kiba thoh pyrshah ia u SP ka East Khasi Hills u Bah Vivek Syiem bad ia u Bah Prestone Tynsong ban pyrshah halor ka jingdon ka jingdawa pisa beain da ki pulit ïa ki draibar trok ha surok bah ha Mawkhanu bad Thangshalai.
Ka KSU ka la thoh da ki kyntien ban dawa ia u Bah Vivek ba u dei ban hiar shuki noh kum u SP ka East Khasi Hills.
Ha ki banner ka KSU ka la buh jingkylli ruh ba u SP u ioh jingbit naei ban phah pynpra ia ka sem ba shong ki pulit ha Mawkhanu bad Thangshalai ban pan pisa na ki draibar trok.
Da kaba niew ia katei ka jaka kum ka jaka ba leh kam sniew ka KSU ka la thoh ha ki banner ba katkum ka ain katei ka jaka kadei ka crime scene bad ym lah ban shu pynpra khlem da tohkit.
