HA KA 12 TARIK U NAILUR 2026, YN LEIT PYNIASOH BJP NOH U DR JEMINO MAWTHOH BAD KI NONGKYRSHAN

Shillong Nailur 05: U Nongialam barim jong ka United Democratic Party u ba dei ruh u MLA barim ka Nongthymmai Constituency u Dr Jemino Mawthoh ha ryngkat bad ki nongkyrshan kin sa leit ban pyniasoh noh ia lade bad ka BJP ha ka 12 tarik u Nailur 2026.
Haba ia kren bad u Dr Jemino lyngba ka phun halor kane ka khubor u la iathuh ba naduh ka por ba u la mih noh na ka UDP, la kumba 15 bnai eiei ma u bad ki nongkyrshan kim pat shim ia ka rai shaei kin leit ban pyniasoh noh. U la iathuh ruh ba hadien ka jingiasyllok bad ki nongkyrshan bad da ka jingiamynjur lang jong baroh ki sa shim ia ka rai ban pyniasoh noh bad ka BJP.
U bah Mawthoh u la iathuh ruh ba na ka liang ki nongialam jong ka BJP na ka por sha ka por ki la wan ban ia kynduh ia u bad iai kylli lano un wan ban rung noh sha ka seng. Na ka liang ka jong u bad ki nongkyrshan hadien ka jingiakynduh bad ia syllok ki la rai rangbah ban shim ia kane ka sienjam bad ha ka 12 tarik u Nailur 2026 ma u bad ki nongkyrshan kin sa pyniasoh noh ia lade bad ka BJP.
Shuh shuh u Dr Jemino u la iathuh ruh ba ha ka por ba u dang don bad ka UDP u la pyrshang kat la I bor ban wad ki lad ki lynti ban pyniatylli ia ki seng riewlum hynrei kam ilah satia ban pyniatylli ia ki, dei na kane ka daw ka la dei ka por ban pyrkhat bha haba ia dei bad ka long ka man jong ka jylla.
U Dr Jemino Mawthoh u la ong ruh ba u shim ia kane ka sien jam ban pyniasoh noh ia lade bad ka BJP na ka bynta ka Jaitbynriew bad na ka bynta ka Jylla Meghalaya.