Pynursla Jylliew 05: Ka Eco-Club bad NSS Unit jong ka Asorphi Academy Higher Secondary School, kala rakhe ïa ka World Environment Day 2026, ha
Pynursla, ryngkat ka jingïatreilang bad ka Office jong u Sub-Divisional Officer (Civil), Pynursla Civil Sub-Division bad ka Social Forestry Range, Pynursla, ki la pynlong ïa ka prokram thung dieng (Tree Plantation Programme) ha phyllaw jong ka Mini Secretariat, Pynursla.
Ha kane ka prokram la sakhi da ka jingiadonlang u Shri G. Warjri (MCS), Sub-Divisional Officer (Civil), Pynursla Civil Sub-Division, Shri B. Laso, nongmihkhmat jong ka Social Forestry Range, Pynursla, Dr. Seven Dar Dkhar, Principal jong ka Asorphi Academy Higher Secondary School, ryngkat bad ki nonghikai, ki samla pule, ki volunteer jong ka NSS, ki dkhot jong ka Eco-Club jong ka skul bad ki nongtrei jong ka ophis u SDO.
Haba kren sha kiba la wan shimbynta ha ka jingthungdieng, u SDO u la ban jur halor ka jingdonkam jong ka jingïada bad jingïakhun na ka bynta ban pynneh pynsah ïa ka mariang. U la kyntu ruh ïa ka pateng kaba dang khie ban shim bynta shitrhem ha ka jingïada ïa ka mariang bad ha ka jingïakhun pyrshah ïa ka jingjulor jong ka sawdong sawkun. U la pynpaw ruh ba ka jingthung dieng ka long kawei na ki lad iada bad ban pynbha ïa ka mariang bad ban pynneh ïa ka lawei jong ki pateng ki ban sa wan.
Kum shi bynta jong ka prokram, palat 100 tylli ki tynrai dieng la thung ha ka phyllaw jong ka Mini Secretariat bad ha ki jaka ba marjan. Kane ka jingthung dieng ka thmu ban pynheh ïa ka jingjyrngam jong ka thaiñ bad ha kajuh ka por ban pynsngewthuh ïa ki samla pule bad ki paidbah shaphang ka jingdonkam ban sumar bad ïada ïa ka mariang.
La pynkut ïa ka prokram da ka jingkular lang jong baroh ban ïada ïa ka mariang bad ban bteng ban noh synniang sha ka lawei kaba khuid bad kaba jyrngam. Kane ka prokram ka la long ruh kum ka jingpynkynmaw kaba don jingmut ïa ka jingbahkhlieh lang jong ki briew bad ki kynhun treikam ha ka ban pynneh pynsah ïa ka mariang na ka bynta ki pateng ban wan.
