Shillong Nailar 11: Ka Meghalaya AIDS Control Society (MACS) ka la sdang ia ka jingialap pynsngewthuh na ka bynta ka jingpang HIV ha kylleng ka jylla naduh lashai ka sngi balai da kaba pynleit jingmut ha ka jingsumar, ka jingleh test, ka jingiada bad ka jingshah niew bein na ka bynta kiba ioh ia une u khniang jingpang.
U myntri ka tnad ka koit ka khiah u Bah Wailadmiki Shylla u un sa plie ia kane ka prokram ha Lady Keane College ha Shillong. Ka jingsdang jong kane ka jingialap kan long ha baroh 12 tylli ki district ka jylla bad kam thmu na ka bynta ki nongshong shnong, ki longkmie ba armet bad ki samla la ka long ha ki nongkyndon ne sha sor ruh kumjuh.
Kum shi bynta kane ka campaign yn pynlong ia ka jingpynsngewthuh ha ki 126 tylli ki shnong, ryngkat bad ka jingialang ha ki 3000 tylli ki prokram ha ki skul bad 85 tylli ha ki college. Kane ka prokram kan pynlong ruh ia 15 hajjar tylli ka jingleit rung man kawei pa kawei ka iing 30 tylli ki jingialang pynshai paidbah, 30 tylli ki jingpyni paidbah bad 16 tylli ki jaka ai jingiarap ba kyrpang ha ki hospital jong ki district.
Ka MACS kan pyndonkam ia ka social media,ka digital, ki shnong ki thaw bad ki jingtip ba la pynshong nongrim ha ka QR ban rah ïa ki jingtip ba ïadei bad ka jingpang HIV sha ki paidbah.
U Project Director MACS Dr K.L. Iawbor u la ong ba kane ka prokram kan pynleit jingmut na ka bynta ban ai jingtip halor ka jingiabit bad ka jingiada na u HIV, ban pynshlur na ka bynta ban leh kham kloi ia ki test, bad ban weng ia ka jingshah niewbein bad jingshah lehbein kaba ki briew kiba im bad ka jingpang HIV ki iakynduh.
Kane ka jingïalap ka long hapdeng ka jingbteng ban lap ïa kiba ïoh thymmai ïa u khñiang jingpang HIV ha Meghalaya. Hapdeng u bnai Iaiong haduh u Jylliew, la lap ba ki don 558 ngut kiba don ia ka jingpang HIV napdeng ki paidbah baroh, katba 16 ngut ki kynthei kiba armet ki la shah test.
Kane ka jingïalap kan bteng haduh ka 12 tarik u Lber, ha kaba ka MACS kan ïatreilang bad ki tnad sorkar, ki jaka pule, ki sengbhalang bad kiwei kiwei ki nongïashim bynta ban pynthikna ba ka jingpynsngewthuh shaphang u HIV kan poi sha ki paidbah ha kylleng ka jylla.
