KA SHNONG KABA DON HA JAN KA JAKA PYNMIH BORDING HYNREI KA BAI LIGHT KA KIEW BAD LIP LIGHT MAN KA POR

Shillong Naitung 18: Ka jingeh kaba ki nongshong shnong ki mat na ka daw jong ka jingkiew palat jong ka bai bording ka pynlong ki nongialam jong ka shnong ban mih sha khmat ban klyrpad ia ka sorkar khamtam ia ka tnat Bording ban peit lem khnang ba u duk u suk un lait na kine ki jingeh kiba ki mat na ka por sha ka por.
Na ka liang U Rangbah Shnong jong ka Mawlyndep Umiam u bah Jinu Kharbuki ha ryngkat ki dkhot ka Komiti bad ki nongialam jong ka seng Longkmie hynne ka sngi ki la mih sha khmat ban pynpaw ia ka jingeh kaba kum ki nongshong shnong ki mat da ka daw jong ka jingkiew palat ka bai Bording bad ka jinglip light khah khah kaba buh jingeh ia ki khynnah skul ki ba don ha ki eksamin kiba pher bapher.
U Rangbah Shnong u la ong ba kane ka jingkiew palat jong ka bording ka long sha bapalat, ka shnong ka leit ban ia kynduh ia ki tnat ba dei peit na ka por sha ka por, hynrei ka jingkiew jong ka bai bording ka nang iaid kiew na ka wei ka por sha ka wei pat. U la iathuh ruh ba ka don ka wei ka iing jong ki kong kaba ha kine ki bnai ba la dep ka bai bording ka dei tang 400 tyngka, 500 tyngka hynrei mynta u bnai ka la kiew syndon sha ka 1614 kum kine ki buh jingeh ia ki paidbah kiba than gar bad lai tylli ki bor light bad ka iing ruh kaba rit , ka bai bording pat ka heh.
U la ong ba kum ka dorbar shnong ka wan sha khmat ban kren ia ka jingeh kaba ki nongshong shnong ki ba wan ban ujor sha u bad haba u peit ia ka bai bording kaba rim ka duna bad kaba mynta pat ka palat hajar , duh ruh ki ba duna hajar. Shuh shu u la ong ruh ba ki don kiba ong ba ka meter ka la sniew ki paidbah nongkyndong shaei kin tip ia kata , kim dei ki ba la nang la stad ban ithuh ia kat, ha ka jingshisha kito ki ba wan ban peit Meter ki dei ban iathuh ba ka meter ka la sniew ne ka tnat ba dei peit ka dei ban pyntip sha kito ki longiing ba ka meter ka la sniew khang ba kin lah ban wan ban kylliang ia ki.
U bah Kharbuki u la ong ruh ba ka shnong jong ki ka don ha Jan Umiam hynrei ka lip light khah khah, mynshuwa ki don ki nongtrei na ka tnat bording lai ngut ban peit hynrei mynta ki don tang u wei u ba hap ban peit ia kumba 28 ne 29 tylli ki shnong.
U la ther da kaba tyngeh da kaba ong ba lada slap ruh lip light, da lyer bar it tuh lip light namar une u nongtrei um lah shuh ban peit marwei. Ka shnong ka kyrpad ia ka tnat ban buh nongtrei la kumno kumno ar ne lai ngut ban lait na ka jingshah ktah jong ki jaka pule, ki hotel bad ki wei kiwei.
Ka dorbar shnong ka kyntu ia ki bor ba dei peit ban peit lem namar kim lah shuh ban shu ujor tang sha ophis namar ki ai daw da kumne kumtai, ka tnat ka dei ban peit bad weng ia ki jingeh kiba ki paidbah ki mat.