Shillong Naitung 17: Ki Nongialam jong ka All Meghalaya Auctioneer Fraternity ha ka 16 Tarik u Naitung 2026 ki la leit ban ai da ka jingthoh sha u Myntri Rangbah ka Jylla U Conrad Sangma bad ruh sha u Symbud Myntri Rangbah u Bah Sniawbhalang Dhar ban weng shuwa ia ka jingkhot tender da kaba leh online bad ban ailad shuwa ia ki briew na ka Jylla haba ia dei ki tiar ban scrap.
Haba kren bad ki Nongthoh khubor u President ka Meghalaya Auctioneer Fraternity u bah R Diengdoh u la ong ba ka seng ka pynpaw ia ka jingsngewkhia haba ia dei bad ka tender ba khot da ka tnat transport ban sdang ia kata kaba ki khot ka Registered Vehicle Scrapping Facility and Automated Testing Station.
U bah Diengdoh u la ong ba na ka liang ka jong ki kim don eiei ban pyrshah ia kane ka policy jong ka sorkar,hynrei ki don ka jingeh kaba namar na ka liang ka ophis jong u Commissioner jong ka tnat transport u la khot ia ka tender ha ka 15 Tarik December 2025 ban ai ia kane ka jaka ha Sumer ban buh ia ki kali ki bym pyndonkam shuh ne ba la scrap.
Ka kynhun ka la leit ban thep ia ka tender sha ka tnat Transport bad ha ka ba ki leit thep ki la pynpaw ba ki la pynjlan sha ka 28 Tarik kyllalyngkot 2026 bad hadien kata haba ki wan ban thep biang ka ophis ka la pynpaw ba la weng noh ia ka tender, ka kynhun kam don eiei ban pyrshah hynrei ki sngew lyngngoh ba ki la weng noh, hynrei synded synded ka mih ka khubor ba ki la khot biang ia ka tender, ka seng ka sngewlyngngoh ia kane bad pynpaw ba ki thrang ba ka tender ka dei ban long beit Offline kumba leh mynshuwa.
U bah Diengdoh u la ong ba ka jingkhot tender online ka dei ban khanglad ia ki trai Jylla namar ka seng ka kwah ban ailad ia ki Samla hynrei haba ki upload bad thep ki shem ba ki kyndon ki la pher. Kine ki kyndon jong kane ka tender ba mynta ki khanglad ia ki trai Jylla kiba trei ia kane ka kam.
Ka Seng ka pynpaw ba ia kane ka tender ka sorkar ka dei ban ailad ia ki trai Jylla ban trei ia kane ka kam.
Na ka liang u Bah Larry C Nongkynrih General Secretary ka All Meghalaya Auctioneer Fraternity u la ong ba kane ka dei ka kam kaba ki la trei. U la ong ruh ba balei ka sorkar kam khot ia ki ban ia kren.
Ka Seng ka kyrpad ia ka sorkar ban pynsangeh noh ban ai khot tender online hynrei ban leh beit da ka offline kumba ki ju leh mynshuwa.
