Mawkyrwat, Naitung 13, 2026: U Bah Renikton Lyngdoh Tongkhar, MLA ka Mawkyrwat Constituency u la plie paidbah ïa ka Dorbar Hall ba thymmai jong ka shnong Mawthawiang Nongtraw, South West Khasi Hills District, kaba la long ka jingangnud kaba slem jong ki paidbah nongshong shnong bad kaba mynta ka la urlong.
Ïa kane ka Dorbar Hall la tei lyngba ka skhim Special Rural Works Programme (SRWP) jong u snem 2023–2024 ryngkat bad ka jingïarap na ka skhim MGNREGS, ha ka jinglut kaba kot haduh T. 10 lak tyngka.
U Bah Renikton Lyngdoh Tongkhar haba kren ha ka jingïalang plie paidbah, u la pynpaw ïa ka jingsngewkmen ban ïoh plie ïa kane ka Hall kaba un long ka jingmyntoi kaba khraw ïa ka shnong bad ki paidbah. U la kular ruh ban dang bteng ban wad jingïarap na ka bynta ban pynbiang shuh shuh ïa ki tiar bad ki jingdonkam hapoh ka Hall, khnang ba kan lah ban shakri pura ïa ka jingdonkam jong ki nongshong shnong.
Ha kajuh ka por, u MLA u la ai khublei kyrpang ïa ki paidbah ka shnong Mawthawiang Nongtraw kiba la pyni ïa ka mynsiem jingïatreilang bad ka jingsngewnguh, da kaba khot burom ïa u sha kane ka prokram watla, kumba u la ong, ka jingïarap kaba u la noh synñiang ka dang rit.
Shuh shuh, u Bah Renikton u la pynpaw ïa ka jingkyrmen ba ka shnong Mawthawiang Nongtraw kan nang kiew shaphrang ha ka roi ka par lyngba ka jingïadon jong ka St. Francis D’Assisi School, Tynsom, Mawthawïang kaba dei kawei na ki skul ba pawnam ha katei ka thaiñ. U la ïathuh ruh ba u la pynïoh ïa ka skhim ban shna surok ban pynsuk ïa ka leit ka wan jong ki khynnah skul, khamtam ha ka por lyiur. Nalor kata, u la ong ba ka projek surok PMGSY hapoh ka shnong ruh ka dang ïaid shaphrang bha bad yn sa pyndep noh shen ban pynmyntoi ïa ki paidbah.
