Shillong Naitung 09: Ka Don Bosco Youth Centre, Laitumkhrah, Shillong, kaba dei ruh ka nongpynïaid ïa ka rynsan ïakob rwai “Ka Sur Kynud” ha ka sngi Balang ka la pynlong ïa ka jingïalang ban kitbok bad buh jingïaduwai kyrpang na ka bynta u Samla Kitkupar Nongsiej, u ban sa ïoh ban sha ka jingiakop rwai World Championship of Performing Arts (WCOPA) 2026 ka ban sa long ha Las Vegas, United States of America (USA).
U Samla Kitkupar u dei na ka shnong Kynshi, Eastern West Khasi Hills District, u dei khun baheh duh napdeng ki 4 ngut shi para.
U Samla Kitkupar u dei u nongjop “Ka Sur Kynud” Season-3, u la dei ban leit sha USA naduh u snem ba la dep, hynrei namar ka jingbym ïaid beit ki kam ha ka pyrthei na ka daw ki jingïakynad hapdeng ki ri, la pynkynriah noh ïa katei ka jingïakob sha u Naitung mynta u snem, kane ka jingleit jongu un mihkhmat ïa ka India hapdeng ki 60 tylli ki ri jong ka pyrthei.
Katkum ka prokram, u Kitkupar un mih na Shillong ha ka 10 tarik Naitung, katba ka jingïakob kan long naduh ka 13 haduh ka 21 tarik Naitung, 2026, ha Las Vegas, Nevada. U kpa jong u, u Bah Aibari Kupar Syiemlieh, un synran lang ïa u ha kane ka jingleit.
Ïa ka jingïalang kitbok la pynïaid da u Director ka Don Bosco Youth Centre, Rev. Fr. Michael Makri, katba u Shillong Salesian Provincial, Rev. Fr. John Zosiama, u la long kum u kongsan. Ha kane ka jingïalang la don ruh ka jingduwai plie, ka jingpule na ka Baible bad ka jingduwai na u Rev. Pastor A.I. Kharshiing.
Haba ïoh ban ïakren ïa u Samla Kitkupar u la ïathuh u sdang nyngkong ban rwai na ïingmane ha ka por ba u dang 6 snem ka rta bad kham hadien lyngba ka jingkyrshan u kpa jongu, u la sdang ban leit ïashimbynta bad jop ha ki jingiakop rwai kiba khamheh kum ha ka Voice Hunt bad ha ka jingiakop rai ba la pyniaid ha ka cherry blossoms ha ki snem ba la dep.
Shuh-shuh u la ong ba ka jingiohlad jong u ban leit ia shimbynta sha ka World Championship of Performing Arts (WCOPA) 2026 ka dei lyngba ka jingjop jong u ha “Ka Sur Kynud Niam” bad shah jied ban leit sha katei ka jingiakop kaheh duh ha ka pyrthei.
Haba iadei ka jingpynkhreh u la iathuh ba u la pynkhreh bha namar ka jingïakop rwai ruh kam dei shuh kaba suk bad ia ka jingrwai ruh hap rwai tang shi minit thik, u la iathuh ba u jied saw tylli ki kyrdan ban rwai bad kaba donkam ka long ban jop ha baroh ki kyrdan.
Haba iadei ka jingbishar ia kiba tbit ban rwai u la iathuh ba ka jingjingbishar kan dei beit thik na ka sap rwai u nongiashimbynta bad ka jingbishar kan long beit thing tang na ki nongbishar ba la buh, kan nymdon kano kano ka jingkyrshan lyngba ki vote.
