Shillong Naitung 08: U symbud Myntri Rangbah ka jylla u bah Sniawbhalang Dhar hynne ka sngi u la ong ba ka sorkar Meghalaya ka kular ban thied jaka ha kylleng ka jylla ban theh ia ki nuit kiba mih na ki iew ki hat, u la iathuh ruh ba ka jaka theh niut ha Nonghali ka la suki noh hadien ba ki don ki trai shnong kiba leit sha Iingbishar.
Haba kren bad ki Nongthoh khubor ha ophis treikam jong u ha Secretariat u bah Sniewbhalang u la ong ka sokrar ka dang pynkhreh ban shim ia ka rai kaba katduh haba ia dei bad ka jaka theh niut ha Nonghali, hynrei ka jingleit sha iingbishar ka la pynshuki noh ban pyntreikam ia kane ka projek.
U Symbud Myntri Rangbah u la ong ba ka sorkar ka thrang ban don man la ki jaka ia kine ki jaka theh niut kat kum kane ka juk ba mynta. U la iathuh ruh ba ki kam mki la iaid sha khmat ha ki kato katne ki jaka kynthup ia ka Tura bad ki wei ki Nongbah jong ka District.
Haba ia dei bad ka jaka theh niut ha Jowai u bah Dhar u la iathuh ba ka kam nka la iaid shait shait, ka juingioh jingbit na ki tnat bapher bapher ka la iaid bad mynta ka sorkar ka dang ap sa ia ka jingmynjur jong ka shnong bad ki trai jaka, ha shuwa ban leit sha Meghalaya State Pollution Control Board ban pyndep ia ki kam kiba dei ban pyndep.
U la iathuh ba ka sorkar ka peit kumba lai ne saw tylli ki jaka na ka bynta ka jaka theh niut ha Jowai bad na pdeng jong kine kin sa jied kano kaba biang ka ban lah ban pynneh pynsah ruh ia ka mei mariang.
