Shillong Jylliew 04: Ha ka step 04 tarik u Jylliew, 2026, ka Khasi Students Union (KSU) ka la wah da ki flex bad ki banner ha ki rud surok kylleng ka nongbah Shillong kiba don ia ki jingthoh ba da leilei yn nym shah ban khlong ia marpoh-khyndew Uranium na ka jylla.
Ym tang katta kine ki flex bad ki banner kiba la wah bad teh ha ki jingker rud surok ki la kdew ba ka Sorkar India ka dei ban mynjur bad ai pyntreikam noh ia ka Inner Line Permit ha Meghalaya kumba la mynjur da ka Ïing Dorbar Thawain ka Jylla la jan kot 7 snem mynta.
Kane ka jingwah ia ki flex bad banner ka long ruh katto katne shwa ba u Amit Shah, Myntri Kam-Pohīing Ka Sorkar un leit ban khlieh ia ka 73rd Plenary Session jong ka North Eastern Council (NEC).
Ha kane ka Plenary yn ia donlang da u Union Minister for Development of North Eastern Region (DoNER) bad Vice Chairman ka NEC, u Jyotiraditya M. Scindia, u Minister of State for DoNER, u Dr. Sukanta Majumdar, ki Lat bad Myntri Rangbah, ki Myntri Sorkar bad ki heh Sorkar India bad Sorkar Jylla.
Ha ka por ba ki dkhot ka Union ki dang wah ia ki flex bad banner ha thaiñ Polo, la wan ki bor pulit ha ka jingïalam u Bah Vivek Syiem, IPS, SP ka East Khasi Hills nalor ki majistor.
Ki dkhot ka Union ki la kyntu ia ki bor pulit ban nym tar ne weng ia ki flex bad banner namar kine ki mat jingpyrshah bad jingdawa ki dei kiba donkam na ka bynta ka Jylla Meghalaya ia kaba ki pulit ki la ong ba kin nym weng.
Nalor ar tylli kitei ki mat, ka Union ka dawa ruh ia ka thungkam thungjam kaba khuid bad pynmyntoi ki samla trai ri trai muluk kum ha NEIGRIHMS, nangta ka jingshah knieh khyndew ha ki jaka khappud lem kiwei-kiwei pat.
