Jowai Jylliew 17: Ka Jaintia Student’s Union ka la pynpaw ka jingsngewkmen ba ki ar ngut ki myntri kata u Bah Sanbor Shullai myntri ka tnad Arts and Culture bad u myntri ka koit ka khiah uba dei u MLA ka thain ki la leit ban jurip ia ka jaka ban tei ia u motdur u Kiang Nangbah ha Mihmyntdu.
U President ka seng u Bah Jersom Shylla u la pynpaw ba ia kane ki la dawa naduh u snem 2022 ha ka por ba u Bah Sanbor Shullai u long u myntri ka tnad arts and culture hynrei hadien ba la long myntri noh da uwei kane ka kam ka la sahkut noh bad mynta haba u Bah Sanbor u la long biang kum u Myntri na ka liang jong ki ki la pynsngew biang halor kane.
Ka seng ha kane ka sngi ka la pynsngew ruh sha ki myntri halor ka jinglong jingman ka State Central Library ha Jowai kaba donkam ban tei thymmai noh ia ka bad ki kyrmen skhem ba kane ka jingwan jngoh ki ar ngut ki myntri kan long ka jingkyrkhu ia ki bad kine ki jingthmu kin sa urlong noh shen.
