Shillong Jylliew 16: U Superintendent of Police ka East Khasi Hills District, u bah Vivek Syiem haba ia kren bad ki nongthoh khubor halor ka jinglap ia ki met iap jong ki ar ngut kynthei bad shynrang na Barynda jong ka wei ka dukan ha lumsohpoh ha rud ka surok shillong- jowai road u la iathuh ba ki pulit ki la ioh Jingtip ha ka por 7 baje mynstep, bad mar mar ki pulit ka Laitumkhrah Police station ki la leit sha kane ka jaka bad la iohi ba u don u Tyllai ha Ryndang jong ki, mar mar ki pulit ka ker noh ia kane ka ja bad khot ruh ia ka Kynhun Forensic ban leh ia kaba don kam.
U Bah Vivek u la iathuh ruh ba ia kine ki arngut la ithuh ia ki kum u Semanto Hajong 21 snem ka rta bad ka kynthei ka kyrteng ka Pronome Hajong kaba na Balat. Ki pulit ki la pyntip sha ki ba ha iing ha sem jong kine ki arngut.
U Bah Syiem u la iathuh ba kat kum ka jinglap ia ka jingtohkit kaba ki leh mynnin ha kato ka jaka ba ki lap, kim shym la lap dak mong ha ka met jong ki lait noh tang na ryndang, ia ka met jong kine la rah noh sha NEIGHRIMS ban leh ia ka Post Mortem bad ia ka report ym sa ioh ha kine ki sngi ki ban wan. Halor kane ka jingjia ki la register da ka UD case ha Laitumkhrah PS.
Shuh shuh u la iathuh ba kine ki arngut ki trei hajan jong kato ka jaka hi bad ki la ialang samla kato katne, haduh mynta hi ka paw ba ka dei ka jingshim hi ia la ka jong ka jingim hynrei yn sa tip shai hadien ba la ioh ia ka Post mortem report. Ki pulit ki dang pynlong ia ka jiingtohkit ia ka daw ba ki phasi ia lade, kaei ka daw kaba kin hap ban dkhat ia ka jingim lajong.
U la iathuh ruh ba ia kane ka jingjia ki pulit ki iohjingtip na u Rangbah Shnong, kine baroh ar ngut ki trei hajan hangto hi, ka Kynthei ka trei ha ka wei ka Café bad u Shynrang u trei ha ka wei ka jaka die light. Kine baroh arngut ki sha ha Lumsohphoh ka jaka ba la pynkhreh da u Trai. Shuh shuh u la iathuh ba ha kato ka miet ka kynthei ka mih na dukan kumba 12:35 mynmiet bad u shynrang ruh u mih 12:00 Baje mynta ki pulit ki dang tohkit balei kine ki arngut ki shim ia la ka jong ka jingim.
U SP u la iathuh ruh ba ki la ioh ia ki durkhih na ki CCTV kato katne, u la iathuh ruh ba ki pulit ki dang pynlong ia ka jingtohkit ia kane bad ia ka met jong kine ki arngut ki tang shu dep ia ka Post Mortem kin sa aiti noh sha ki ba ha iing ha sem.
