Ai khublei ka AJMRWLU ïa u Conrad Sangma ba mynjur halor ka snem shongthait kiba trei Muster Roll

Shillong Risaw 12: U President ka All Jaintia Muster Roll Workers Labour Union u bah Khroo L Pariat hynne ka sngi haba kren bad ki nongthoh khubor u la ai khublei ia u Myntri Rangbah kajylla bad ia ka kynhun myntri ka ba la rai ba kasnem ban shongthait ia kiba trei Muster Roll bad ki wei ki wei kan dei noh 60 snem.
U bah Pariat u la ong ba ha ki snem ki ba la dep ka wei ka tnat sorkar ka iapher na ka wei pat haba ia dei bad ka rta jingshongthait, ha ki snem ba la dep ki don kiba shongthait ha ka rta kaba 58 snem don ki wei pat ha ka rta kaba 60.
U la bynrap da kaba ong ba lyngba kane ka rai ba ka sorkar ka shim kan long ka jingkyrkhuh ia ki nongtrei khamtam ia kito ki ba la ai ka jingshakri ia ki tnat ka sorkar da ki phew phew snem, ki bym ioh ia ki jingmyntoi la ka dei ka pension ne ki wei.
Ka kynhun Ka kyrpad ia u Myntri rangbah ban pyntrei kam ia kane ka order naduh u snem 2025, ka ban long ryngkat bad ka jingpynbna jong ka tnat Personnel jong ka sorkar jylla. ki la kynruh ruh ba ki dei ban khot biang ruh ia kito ki nongtrei ki ba la shong thait noh ha kine ki snem khang ba kin lah ban bteng ia ka jingtrei jong ki haduh ba kin da kynjoh ia ka rta kaba 60 snem.
Shuh shuh u bah Pariat u la kyntu ia ka sorkar jylla ban peit ba ki tnat kin pyntrei kam ia ka Employees’ Provident Fund (EPF) ia ki nongtrei muster roll bad ki wei ki nongtrei ba siew bylla sngi ha ki tnat sorkar kiba pher bapher, ki jaka pule ne kino kino ki kompani.
Ka kynhun ka la kyntu ruh ia ka sorkar ba ka dei ban thaw noh ia ka Muster Roll Workers’ Welfare Board ba ki nongtrei kin ioh jingiarap bad ki jingmyntoi khamtam na ka bynta kito ki tnat sorkar kiba ym don ki jingiarap kiba kyrpang na ka bynta ki nongtrei bylla sngi. Ki la ai jingmut ruh ba kane ka Board kan trei kam kumba trei kamn ka Building and Other Construction Workers’ Welfare Board.
Ka kynhun ka don ia ka jingkyrmen ba ka sorkar kan sngap ia kane ka jingai jingmut jong ki na ka bynta ka jingmyntoi jong ki nongtrei ha ka jylla.