Shillong Risaw 2: Ka Directorate of Urban Affairs, ka sorkar jylla, lyngba ka Swachh Bharat Mission (Urban), mynta ka sngi ka la pynlong ia ka jingpynkhuid ia ki lynti ki syngkien naduh na Nongpoh shaduh Sohra ha shi lynter ka surok kaba long kumba 100 kilometre kum shi bynta ka Swachhata Hi Seva (SHS) 2026 campaign.
Ia kane ka programme la pynlong halor ka phang pdeng “Ek Din, Ek Saath, Ek Ghanta,” ha kaba la sakhi ruh ia ka jingshim bynta ki khynnah skul, ki college, ki dorbar shnong, ki seng trei mon sngewbha, ki tnad treikam sorkar bad kiwei pat.
Haba kren ha kane ka sngi u symbud myntri rangbah ka jylla u Bah Sniawbhalang Dhar u la ong ba kane ka long ka jingthmu ban wanrah ka jingkylla ha ka liang ka khuid ka suba bad ka jingpynsngewthuh ia ki paidbah ban sumar ia ka mariang lyngba ka jingshim bynta lang jong ki da ka jingkitkhlieh lang ia ka mariang.
U la ong ba ka Swachh Bharat Mission kam dei tang ka programmme ban pynkhuid shnong pynkhuid thaw hynrei ka dei ban wanrah ka jingpynsngewthuh ha ki paidbah kumno ban shim ka jingkitkhlieh ha ka liang ka khuid ka suba.
U la ong ba ka Sorkar Jylla ka pyrshah ban wanrah ka jingïatreilang hapdeng ki paidbah ha sor bad nongkyndong, la ka long ki samla, ki longkmie, ki skul bad kiwei kiwei ki bynta jong ka imlang sahlang ban pynkhlaiñ ïa ki jingpyrshang ban pynkhuid ha kylleng ka Jylla, khamtam ha ka nongbah Shillong.
U symbud myntri rangbah u la ban jur halor ka jingdonkam ban pynmlien ban wanrah ka jingkhuid jingsuba da kaba ong ba ki briew haba ki wan sha Meghalaya ki ju bud ia ka jinglehkhuid namar ka jingmlien ki paidbah ban lehkhuid.
Ha kane ka sngi u Bah Dhar u la pyllait ruh ia 24 tylli ki kali ba kynthup 18 tylli ki kali rit bad 6 tylli ki trok.
Ha kane ka progarmme la shim bynta lang ruh u Secretary sha ka sorkar jylla u S.C. Sadhu, IAS, CEO ka Shillong Municipal Board, P.K. Boro, ki ophisar ba rangbah, u BDO ka Mawlai C&RD Block, ki nongtrei ka CRP, ki khynnah skul, ki nongshong shnong ka Mawlai Mawiong bad kiwei pat.
