Shillong Risaw 1: U SP ka East Khasi Hills u Bah Vivek Syiem u la hukum ban tohkit halor ka jingkynnoh ba don ka jingshim pisa beain ki pulit na ki draibar trok ha shi lynter ka surok national Highway kaba lasaphriang hadien ba la lap da ka KSU.
Haba kren halor ka jingdawa ka KSU ban weng kam ia u bad ia u DC ka EKH u la ong ba u la bthah mar mar ia u SP City u Bah Dangsan Khyriem hadien ba ula iohi ia ki durkhih ba la saphriang ba pyni ia ka jingdon ki pulit ha katei ka surok bah.
U la ong ba ha ka jingtohkit la ithuh ia ki pulit kiba don ha ka iingtrep ba la buh ha katei ka jaka. U SP u la ong ba la buh ia ki pulit na ka bynta ban peit pyrman bad ban pyntikna ia ka jingshngain ia ki trok khamtam ha ka por mynmiet hadien ka jing kyrpad na ki trok association namar ka jingdon ki kam runar.
“haba peit, kam shym la don ka jingpeit bniah kaba biang bad ka don ruh ka lad ba kine ki briew ki lah ban lum pisa beain”, la ong u Bah Vivek da kaba bynrap ba ki durkhih kiba pyni ia ki nongniah trok kiba leit sha ka iing ba shong kitei ki pulit ka la pynmih ia ka jingsuba bad la pynlong ia ka jingtohkit kaba bniah.
U la pynshai ba ka jingtalasi ki pulit kadei ban long kaba shai bad kaba khuid ba suba, ka ban don ki kynhun pulit,nki tiar ki tar bad ym kumba iohi ha ka durkhih ba la ioh ringdur.
U Bah Vivek u la ong ba ki pulit kiba donkti ban leh ia katei ka kam beain kin shah pynshitom bad yn leh ruh ia kaba donkam na ka bynta ban pynkynriah kam ia kiba dei peit ha katei ka jaka. U la ong ruh ba halor kane yn pyntip sha ka District Tranfer Committee na ka bynta ban peit bniah.
Nga kyntu ia baroh ki draibar trok ba kim dei ban siew pisa sha kino kino ki pulit kiba don ha ki suro ha ka District East Khasi Hills lane sha kiwei ki jaka ruh, la onng u Bah Vivek.
U la kyntu ruh ia ki ba kidei ban ujor da kaba pynntip ha u number 112 bad ki lah ruh ban ujor beit beit sha ka ophis u SP lada ki lap ba don kaba kum kane ka jingdawa pisa.
Haba pynskhem ia ka jingtreikam ka tnad pulit, u Bah Vivek u la ong ba ki pulit ka East KHasi Hills kim iashah satia ia kino kino ki kam dawa pisa be shim pisa beain.
