KHUR KA ASSAM BUN TYLLI KI TAKMA HA KA NE INTER-STATE BADMINTON CHAMPIONSHIP

Shillong Nailur 20: Ka Yonex Sunrise North East Zone Inter-State Badminton Championship 2026 ka la poi noh ha kaba kut ha ka 19 tarik u Nailur 2026 ha Indoor Stadium jong ka JN Complex Polo, ha kaba ka kynhun ialehkai ka Assam ki la khur kham bun tylli ki takma, bad la bud sa ki nongialehkai na Mizoram, Manipur bad Arunachal Pradesh.
Ha kane ka kynti, ka kynhun ialehkai ka Assam ki la lah ban ioh khur san tylli ki takma ha ka jingiakhun para marwei, bynrap pat ka Mizoram, Manipur bad Arunachal Pradesh kiba la khur mar ar bad kawei ka takma.
Kumban shu pynkynmaw ba ha ka sngi Palei jong ka taiew, ka Assam ka la lah shwa ba kan khur lut ia ka nam lahduh ha ka kyrdan ialehkai kynhun (team championship) jong ki kynthei bad shynrang bad bynrap lang da ka jingioh khur nam lahduh ha ka kyrdan iakhun jong ka U-19 kynthei bad shynrang.
Ia kane ka lympung ialehkai ba saw sngi ka thain, la pynlong da ka Meghalaya State Badminton Association (MSBA) ha ryngkat ka jingkyrshan lang da ka tnat ialehkai ka Sorkar Jylla bad ba la wan ban pyniaid ia ka da ka Badminton Association of India.
Ka Kongsan ha ka sngi pynkut ka dei ka Director General of Police ka jylla Kong Idashisha Nongrang (IPS), ha kaba ka la ioh ban sakhi ia ka jingiakhun phainal ba shi jur (doubles) jong ki shynrang ha kaba ka Assam ka la jop ia ka Arunachal Pradesh.
Kane ka lympung ialehkai kaba saw sngi, ka la lah ba kan lum lang haduh 270 ngut ki rang ki thei ialehkai bad kumjuh ki khynnah ki jylla ka thain shatei lam mihngi ka ri.