Nongpoh, Nailur 11: Ha jingjia tyngkhuh kali mynta ka sngi, ar tylli ki kali ba kynthup ia kawei ka Renault Duster kaba don ia u number ML05 AA 1799 bad ka Mahindra Bolero kaba don ia u number ML05 S 3352 ki la shah tynrah haka trok kit maw clinker kaba don ia u number NL01 AH 6742 haka surok Shillong Bypass kaba dang hap ha Umroi Madan.
Katkum ka jingioh jingtip, la iathuh ba katei ka trok kaba la niah da u Bah Samely Rymbai naka shnong Moodymai, West Jaintia Hills District, kadei kaba dang wan na Lumshnong bad thmu ban leit sha Sonapur, Assam.
La iathuh ruh ba utei u nongniah udei uba la shoh khawyiang bad mar ia poi ha ki bynta marjan bad ka Tyndai Resort ha Umroi Madan, namar ka jingbym lah teh lakam shuh iaka kali, utei u nongniah trok u la leit ban tynrah beit beit iaki kali kiba la pynsangeh harud surok, kata nyngkong shwa iaka Renault Duster haduh ba kan da pra phom bad hadien pat sa iaka Mahindra Bolero, kaba la ngat ruh haka jingjulor.
Ha kane ka jingjia, u nongniah jongka Renault Duster uba la tip kyrteng kum u Iamutlang Nongspung na Mawryngkneng, East Khasi Hills District u la ngat haka jingmynsaw bad la pynkit noh ia u sha Bhoirymbong CHC naka bynta ban ioh jingsumar, katba haka Bolero pat ym shym la don briew satia haka por jong katei ka jingjia.
La ioh jingtip ruh ba naka liang ki pulit ka Khapmara PIC, ki la tan noh ia baroh lai tylli kitei ki kali sha thanad naka bynta ban leh bad pyndep iaki jingdonkam katkum ki kyndon jongka ain.
