New Delhi Nailur 11: U MLA ka seng BJP na Pynthorumkhrah u bah AL Hek hynne ka sngi u la leit ban ia kynduh ia u Mynti kam pohiing ka sorkar pdeng u Amit Shah ban ia kren halor bun ki mat ki ba ia dei bad ka kam sain pyrthei bad ruh ki wei ki kam jong ka jylla.
Haba ia kren bad u Maram News lyngba ka phun halor ka jingleit ia kynduh ia u Amit Shah u bah AL Hek u la iathuh ba na ka liang ka jong u, u la iakren bad u Amit Shah bad ia ka rai yn sa shim da ki nongialam ka Central, wad la ki nongialam na ka jylla ki tip ia kane.
Shuh shuh u bah Hek u la iathuh ba ka don ka jingiakren bad ki MLA ka UDP ban wan pyniasoh noh bad ka BJP bad mynta ki dang ap sa tang ia ka por kaba biang ba kin sa pyniasoh noh.
Haba ia dei bad ki mat jingdawa jong ki MLA ka UDP na ka liang u bah Hek u la iathuh ba ki jingdawa jong ki ba ki la buh sha ka BJP ki dei ki ba don kam bad ngi hap ban iaroh ia ki. U la ong ruh ba ka BJP ka dei ka seng kaba trei na ka bynta ka jingbha kin hap hi ban pynurlong ia ki jingdawa jong ki.
U bah Hek u la ong ba ki mat jingdawa ki ban iada ia ka ri bad ka jaitbynriew bad ki kam pynroi ki hap ban shim khia ia kata.
Haba ia dei bad ka jingiakynduh bad u Amit shah u bah Hek u laiathuh ba u la iakren la slem bha khamtam haba ia dei bad ka jingpynkhreh ia ka ilekshon 2028 bad u la batai ruh ia u Amit Shah ba nalor kito ki MLA na ka UDP ki dang don ki wei ruh ki MLA bad ki MLA barim kiba ia ka kren bad u ba ki thrang ban ia don ryngkat lang bad ka BJP.
U la iathuh ruh ba baroh ki don kumba 24 ne 25 ngut kiba la thrang ban pyniasoh bad ka seng. Mynta ki dang ap ia ka por kaba biang ba kin pdiang ia ki sha ka seng.
