KA JINGMIH KI KHUBOR BAN RUNG BJP KI MLA KA UDP KA DEI TANG KA KHUBOR HAMSAIA:TITOS

Shillong August 31: Ka jingmih ki khubor hamsaia ba ki 9 ngut ki MLA ka UDP ki don hapdeng ka jingiakren ban pyniasoh noh bad ka BJP kala saphriang sted bha ha kine ki khyndiat sngi.
Haba ia kren bad u General Secretary ka UDP u Bah Titosstarwell Chyne halor kane ka mat u la iathuh ba u la iohi ia kane ka khubor ha ki kot khubor ki bapher bapher, ki social media bad kane ka khubor ka mih naduh ba kine ki MLA lyngba ka jingtip jong ka seng ki la leit ban ia kynduh ia u Amit Shah.
U bah Titosstarwell Chyne u la iathuh ba ka jingleit jong ki ban ia kynduh ia u Amit shah ka dei ban ia kren halor kato katne ki mat kiba kongsan ki ba dei na ka bynta ka jingmyntoi jong ka jylla., ka wei na ki mat kiba ki ia kren ha dei halor ka FCRA , kaba na ka liang ka seng ka pyrshah ia ka Amendment bad pynpaw ba ki kwah ban thun da ka JPC bad ia kata ruh ka la don ka jingjubab jong ka sorkar India, ki don ki wei pat ki mat kiba ki la ia kren kum ka jingshah ktah na ka jingshah khang jong u dewiong , kaba shah tang ia kata kaba ki ong ka scientific method kaba kham eh hynrei ka don pat ka jingshah ktah ia ki barit baria, ki la iakren ruh haba ia dei bad ka ainn ba la mynjur da ka Sorkar jylla kaba dang sah kut ha ka Home Ministry kata ka MRSSA kaba dei ka wei na ki bynta kiba bun ki la pynpaw ia ka jingdon kam, ki la ia kren ruh ia ka ILP, ki la iakren ruh ia ka mat Them Metor bad ki wei ki mat kum ka jingker sainar ha khappud.
U bah Chyne u la ong ba hadien jong kane ka jingiakynduh, la don kiba shim kabu ia kane ka jingiakynduh jong ki MLA ka UDP bad ki heh ka BJP bad pynwan dur ia kane ka khubor ban ong ba ki MLA ka UDP ki thmu ban pyniasoh bad ka BJP, u bah Chyne u la ong ba haduh mynta u la pyrshang ban ia kynduh bad ki MLA bad phun ia ki, ka la don ruh ka PP Meeting ha kaba u Nongialam u la khot bad jan baroh ki la ia don lang bad ki la kren shai ba kam don kaei kaei , ka jingleit jong ki ka dei beit ba ki ia kren halor ki mat ba don kam jong ka jylla, bad kam don kata ka jingmut ne jingthmu ban rung BJP.
U bah Titosstarwell u la iathuh ba la jan man ka sngi ba ki ia kren bad u lyngngoh ba haba ki MLA ki leit donkam sha Kolkata ia kata ruh ki pynlong issue bad ki don ruh kiba ong ba mynne ki don ka meeting ha Guwahati ha kaba ki don kato katne ngut ki MLA kiba ia kynduh ia ki nongialam ka BJP, u bah Titosstarwell u la iathuh ba kat kum ka jingiakren jong u bad ki MLA ki don kiba don ha ki Constituency jong ki, don kiba don ha iing, don kiba don ha Shillong , kaba lyngngoh shuh shuh ba mynnin ka mih khubor ba u President ka UDP u bah Metbah u poi sha Delhi mynsngi saitjain ha kaba mynsngi siatjain ki don ka Meeting ha Khliehriat ha kaba la don lang u President u Bah Metbah, u bah Lahkmen Rymbui, u Bah Kyrmen Shylla bad u la wan phai sha iing la miet namar ka don ka jingdkheng kali ha Mawryngkneng , ngi lyngngoh ba don kiba thoh ba u don sha Delhi.
U la bynrap da kaba ong ba kane ka khubor ka lah ban dei ka jingleh jong no re jongno ban pynkulmar ia ka seng ban wan rah ia ka jingia tharai sniew. U la ong ba ngim lah ban len ki don kato katne ki jingeh ha ka seng hynrei kam mut pat ban don kakiba shim kabu ia kane ka kam iing kam sem jong ka seng.
U la ong ba ka jingshim kabu ka pynlehrain ia ki MLA ka seng, ka pynhiar kyrdan ia ki MLA bad u la iohi ba ka la don ka jingshna ia ki dur ki dar da kumne kumtai kane ka la kthah ia ka ijot jong ki MLA.
U la kyntu ia ki social media bad ia ki nongthoh khubor ban wad ia ka jingshisha bad haduh mynta kampat don ki MLA kiba kren ba kin mih noh na ka seng hynrei don ki ba la kren ba kim tip eiei ia kane ka khubor. U la ong ruh ba ha ka Politik ki ju ong bay m ju don full stop, hynrei ia kaba hadien ngim tip hynrei kumba long mynta ki MLA baroh ki dang don ha ka UDP.