Mawkyrwat Nailar 17: Ki riew rangbah jong ka hima langrin sa shisien ki wer ki khot ia ki paidbah ia ki shynrang bad khyntei ki longkmie longkpa kiba dei ki khun ki hajar ka hima Langrin ba kin ia mih paidbah ha ka 19 tarik u Nailar 2026 mynta u bnai ban leit tur biang sha ka Khasi Hils Autononous District Council ban dawa na ka district council bad ka EC ban weng noh mardor ia u Nongtei syiemiong na ka khet syiem.
Kine ki riew rangbah naduh u bah Fineness Syiemiong , Bah Adira Lyngdoh, bah D. Syiemiong bad bah Beforelan Nonglang ki la pynpaw ia ka jingbym sngewhun ia ka jingsynshar u Paiem Nongtei Syiemiong da kaba kynnoh ba udei u syiem uba leh donbor bad uba kam ri kynti ia ka khyndew jong ka hima, ki la ong ruh ba Ka jingmih ka huri hura ha ka 7 tarik u Nailar 2026 ha Phlangdiloin kaba la wanrah ruh ia ka jingmynsaw ki paidbah bad ki pulit kadei namar ka jingleh donbor jongu syiem ha kaba um shym la ailad ia ki paidbah ba kin kren bad pan jingpynshai ha kaba iadei bad ki kam ka hima.
Shuh shuh ki la ong ruh ba ki khun ki hajar ki da kwah eh ban ioh ka jingpynshai na u syiem ha kaba iadei bad ka jing pyntreikam ia ka Management Board, hynrei ha kato ka sngi um shym la pynshai eiei bad u la pynkut jubor ia ka dorbar bad kane ka jingleh jong u ka la pynbitar ia u paidbah .
Ki la ong ruh ba kane ka jingleh jong u kadei ka bym pat ju jia koit ha ka histori ka hima Langrin ha kaba u syiem un wanrah da ki seng longkmie, ki pulit bad security guard bad khanglad ia ki paidbah ban leit dorbar .
