Mawkyrwat: Kum ka dak ban pynpaw ïa ka jingsngewlem bad ban pynrem ïa ka jingshah pynïap jong ka Kong Joit Kharlyngdoh, kaba 76 snem ka karta na shnong Jakrem, South West Khasi Hills District, ka Dorbar Shnong Jakrem ka la pynlong ïa ka Peace Rally.
Ïa kane ka Peace Rally la sdang na Ïew Mawleiñ – Mawrangkynda bad la pynkut ha Madan Pyndenkseh, ha kaba ki paidbah nongshong shnong ryngkat bad ki nongïalam shnong ki la ïashim bynta shitrhem ban pynpaw ïa ka jingpyrshah ïa kane ka kam runar bad ban kyrpad ïa ki bor ba dei peit ba kin pynsted ïa ka jingtohkit khnang ba kiba donkti ha kane ka kam kin shah kem bad ïoh ïa ka jingbishar kaba hok katkum ka aiñ.
Ha kane ka jingïaid paidbah, ki nongïashim bynta ki la rah ruh ïa ki placard bad pyrta da ki kyntien ban pynrem ïa kane ka jingjia kaba sngewsih, da kaba pynpaw ïa ka jingangnud ba ka jingshongsuk shongsaiñ hapoh ka shnong kan ïai neh bad ba kum kine ki jingjia kim dei shuh ban jia lashai lashisngi.
Ha kajuh ka por, ka Dorbar Shnong Jakrem ka la kyntu ïa baroh ki paidbah ba kin ïai bteng ban don ïa ka mynsiem jingïatreilang, jingïalong kawei, jingïasuk bad jingïaishah para briew, khnang ban pynneh ïa ka jingshong suk shong shngaiñ hapoh ka shnong ka thaw bad ban rat dyngkhong ïa ki kam sniew kiba lah ban pynthut ïa ka imlang sahlang.
Lah ban kdew ba ka Kong Joit Kharlyngdoh, kaba 76 snem ka karta, ka la jah na ïing naduh ka 4 tarik u Naitung, 2026, ha ka por kumba 6 baje janmiet. Hadien ka jingwad kaba bun sngi, la lap ïa ka metïap jong ka ha ka 20 tarik u Naitung, 2026, kumba ha ka por 2 baje nohphai sngi, ha kawei ka jaka khlaw kaba la tip kum ka Pungkse, kaba hap hapoh u pud u sam jong ka shnong Jakrem.
