Shillong Naitung 09: Ka Hill State People’s Democratic Party (HSPDP) ka la pynpaw ka jingpyrshah kaba jur ia ka jingtih uranium ha kajylla bad ka la sngewnguh ia ka rai ka sorkar jylla ban ym ailad ia ka jingtyrwa tih uranium ha ka jylla.
Haba kren sha ki lad pathai khubor ha ka sngi palei u President ka HSPDP u Bah KP Pangniang u la ong ba ka party ka ju iakhun ban pyrshah ia ka jingtih uranium naduh ba dangsdang seng ia ka bad kane ka mat ka dei kaba la sngewkhia la slem bha. U la ong ruh ba katto katne ki nongialam ka HSPDP kiba mynshwa ki la ju ialap pyrshah ia ka jingtih uranium bad ka party kan iai bat ia kata ka nongrim haduh mynta.
U Bah Pangniang u la ong ruh ba ha ka por ba synshar ka sorkar Meghalaya United Alliance (MUA-II) ba la ialam da u myntri rangbah barim u Mukul Sangma, ka HSPDP ka la leit buh ia ki memorandum ha u bnai nailar 2016 ban kyrpad ia ka sorkar ha kato ka por ban pynsangeh ia ki jingthmu tih uranium ha ka jylla.
U la ong ba ka sorkar ka la rai ban weng noh ia baroh ki rai ba iadei bad u uranium bad ka la pynsangeh lut ia baroh ki jingthmu ha kab aiadei bad u uranium ha West Khasi Hills.
U President ka HSPDP u la ong ba ka party ka pdiang ia kine ki rai ha katei ka por bad pynpaw ba ka sorkar ba mynta ruh hapoh ka jingialam u Conrad Sangma ka dei ban iai bteng ban bud ia kajuh ka jingthmu.
Haba kren sha ki lad pathai khubor u Bah Pangniang u la ai khublei bad iaroh ia ka sorkar ha kaba u myntri rangbah u la kren shai ba ka sorkar kam don jingthmu ban ailad ban tih uranium ha ka jylla.
