Shillong Jylliew 20: Ki nongshet ja skul hynne ka janmiet sngi saitjain ki la leit ban rah plakad hakhmat ka Courtyard by Marriot ban pynpaw ia ki jingdawa jong ki ban pynkiew noh ia ka bainong jong ki kaba khlem pynkiew la da ki phew snem.
Kine ki nongshet ja skul ki la leit ban rah plakad ha courtyard namar ba ka don ka myntri ka tnad pla tyngka ka sorkar pdeng ka Nirmala Sitharaman kaba wan jngoh ia ka jylla.
Kine ki nongshet ja skul ki la dawa ban pynkiew ia ka bainong na ka 900 sha ka 9000 tyngka ha ka shi bnai.
Kine ki nongshet ja skul ki ioh bainong 900 na ka sorkar pdeng bad 1100 na ka sorkar jylla ha kaba ki la dawa ha kine ki sngi ban pynkiew noh ia ka bainong jong ki khnang ba kin lah ban pyndap ia ki jingdonkam jong ki namar ba ka dor ki mar ki mata ki la nang kiew.
U myntri rangbah ka jylla u Conrad sangma u la leit ban iakynduh ia ki bad u la kylli ruh kaei ka mat jingiakhih jong ki. Haba u la iakren bad kawei na ki longkmie ka la iathuh ba ki nongshet na Jaintia ki la iakynduh ia ka Nirmala Sitharaman ban iakren bad ka halor kane bad ong ba kane ka jingleit rah plakad jong ki ka long tang ban pyni dak ia ki jingdawa jong ki.
Haba ia kren bad ka Kong Gina Nengnong ka President jong ki nongshet ja skul ha khmat Marriott ha ka por ba ki rah placard ha khmat ka jaka ba sah ka Myntri Pla Tyngka ka sorkar pdeng ban dawa na ka sorkar ban kyntiew ia ka bhah ba ka sorkar pdeng ka siew na ka bynta ka jong ki.
Ka Kong Nengnong kala iathuh ba ki dkhot jong ka Union ki la ia kynduh ia ka Nirmala Sitharaman ha jowai ban pynpaw ia ki jingdawa jong ki ban kyntiew noh ia ka bhah na ka Sorkar pdeng.
Ka la iathuh ba ka Sorkar Jylla ka la kyntiew ia ka bha, hynrei ka sorkar pdeng kam pat kytiew ia ka haduh mynta la kumba 20 Snem.
