Nongpoh, Jylliew 20: Kawei ka jingjia tyngkhuh kali ha Ri Bhoi, ha kaba ka kali Hyundai Grand i10 kaba don iaka jingthoh PRESS nakhmat hadien ka jingpynher sted kaba palat, kala leit ban jam na shilliang sha shilliang ka surokbah National Highway 6 ha Jyntru bad leit ban tynrah pat iaka Tata Nexon kat haduh baroh ar kitei ki kali kila julor bun.
Katkum ka tyllong khubor, la iathuh ba katei ka jingjia kadei haka por 5 duna eiei mynta ka janmiet katba katei ka Hyundai Grand i10 kaba don ia u registration number ML05L8767 ka dang kiew sha nongbah Shillong. Namar ka jingpynher sted palat, u nongniah um lah shuh ban teh lakam iaka kali bad leit ban jam sha shilliang ka surokbah bad tynrah pat iaka Tata Nexon kaba don ia u registration number TG07E5517 kaba dang hiar sha nongbah Guwahati.
La iathuh ruh ba tang mar ia dep tynrah, u nongniah katei ka kali Hyundai Grand i10 ula phet krad ialade na katei ka jaka bad ieh jyndat ia uwei pat uba shong hapoh kali, uba la ngat haka jingmynsaw kaba malu mala. La ioh jingtip ruh ba lai ngut kiwei pat kiba shong hapoh katei ka kali Tata Nexon ruh kila ngat lang haka jingmynsaw kaba malu mala.
Haba ioh ban iakren bad utei uba shong hapoh ka kali Hyundai Grand i10, u la iathuh ba ka kali kadei ka jong u kpa jong u bad ba u dang thmu ban kiew sha Shillong ryngkat bad utei u draibar uba la phet krad na katei ka jaka. U la iathuh ruh ba um shym la tip eiei kumno katei ka jingjia tyngkhuh kali kala jia naba u don hapdeng ka jingiohthiah ha katei ka por.
Na ka liang ki pulit ka thanad Nongpoh kiba la wan poi ha katei ka jaka, kila tan noh ia baroh ar tylli ki kali sha thanad naka bynta ban pynlong iaka jingtohkit.
