Shillong Jylliew 05: U MLA ka seng BJP na Pynthorumkhrah u bah A.L. Hek hynne ka sngi u la iathuh ba ka seng kam pat rai ia u Kyrtong u ban iakhun ia kane ka ielekshon shiteng samoi jong ka Shillong Lok Sabha, wad la bun kiba pynpaw ia ka jingthrang ban ia khun ia kane ka ilekshon.
Haba ia kren bad ki nongthoh khubor u bah Hek u la pynpaw ba ki don haduh khyndai ngut ki nongialam ka seng ki ba thrang ban ia khun ia kane ka ilekshon bad ka seng shen kan sa lum ia ka jingialang ban ia kren iano yn ai tiket na kine ki ba pan.
“Ngim pat shym la rai ia ka kyrteng jong no ngin phah kum u Kyrtong. Ka seng shen kan sa ia kynduh bad shim ia ka rai jong u Kyrtong ka BJP u ban ia khun ia kane ka ilekshon shiteng samoi na Shillong Parliamentary Constituency,” ong u bah Hek.
Haba jubab ia ki ki khubor hamsaia ba yn don ki ban wan rung thymmai sha ka seng u bah Hek u la ong ba ka seng ka plie ia ka jingkhang bad ka pdiang sngewbha ia ki lada ki thrang ban pyniasoh bad ka BJP. Hynrei u la ban jur da kaba ong ba ka rai kaba khatduh kan dei ia u kyrtong u ba don ka jingkyrmen ban jop ba un mih khmat ia ka seng ha kane ka ilekshon.
“ Uno uno u lah ban pan tiket. Lada mano mano ki pyniasoh bad ka BJP ngi pdiang sngewbha ia ki, ha kaba kut ka seng kan sa rai ia u ba ibit bad u ba don jingkyrmen ban jop.” U la ong.