Shillong Nailar 11: U nongtem guitar uba tbit bad ba pawnam ha ka pyrthei u Marcin Patrzałek uba la wan sha India ha ka sngi Ba ar u la pynpaw ka jingsngewtynnad ba u wan poi ha Shillong namar ka jingitynnad ka mariang, ka kolshor ha ki jingtem jingrwai bad ka jingshong shit ki nongpeitkai ki samla na ka jylla.
Haba kren sha ki lad pathai khubor ha ka jingwan jngoh ba nyngkong eh jong u ha Shillong u Patrzałek u la ong ba ka jingwan jong u naduh na kad liengsuin sha Shillong u la ioh lad ban iohi ia ki lum kib aitynnad jong ka Shillong.
“Ka la long shisha kaba phylla ban wan shane ha ka sien kaba nyngkong,” u la ong bad bynrap ba ka India ka paw ba ka pher bha ha ka kolshor na ka ri Poland kaba u shong u sah..
U Patrzałek u la ong ba u itynnad palat ia ki jaka ha shilynter ka lynti ban wan sha Shillong bad u la ring dur bunsien ia ki video na ka kali ha ka por ba dang iaid. Haba batai ia ka jingsngew jong u, u la ong ba u sngew kum ba u don ha kawei pat ka pyrthei .
La tip ia u na ka bynta ki sap ba kyrpang jong u ha ki tiar tem bad ki jingrwai ba la pynsawa, u Patrzałek u la ong ba u la ioh mynsiem na ka jingkyrshan ki nongpeitkai ha kylleng ka ri India. U la kdew ba ka rukom tem jong u ka long kaba kyrpang bad ka iapher ha ka liang ka jingstad na ka rukom tem guitar kaba ju leh.
“Ban ïohi ïa kum kane ka jingshim bynta kaba khraw ha India ïa kane ka jingtem ka long kaba phylla,” u la ong.
Kum shibynta jong ka jingwan jngoh ha Shillong, u Marcin Patrzałek un sa shim bynta ha ka “Marcin Art of Guitar Tour 2026” ha ka 12 tarik u Nailar ha Lariti Performing Centre, Mawkasiñ, Shillong. La khmih lynti ba kane ka jingshim bynta kan wanrah ia ka rukom tem guitar ba kyrpang jong u sha ki riew ieid rwai bad ki riew ieid tem ha kane ka nongbah.
Ka jingwan jong u Patrzałek sha Shillong ka dei shi bynta jong ka jingwan jngoh jong u sha India kaba dang ïaid shakhmat, ha kaba u la leit ha ki katto katne ki nongbah jong ka ri bad ïakynduh bad ki nongtem, ki samla pule bad kiba sngewtynnad ïa ka jingrwai.
